| ● ᠲᠠᠭᠤᠳᠠᠭᠠᠴᠢ ᠡᠩᠬᠡᠬᠠᠳᠠ | ᠨᠢᠬᠡ | ᠰᠢᠨᠡᠬᠡᠨ ᠮᠠᠨᠳᠤᠭᠰᠠᠨ ᠨᠠᠷᠠᠨ ᠤ ᠨᠠᠭᠠᠭᠤᠷ ᠵᠡᠯᠡᠯᠡᠨ ᠨᠢᠰᠬᠦ | ᠰᠢᠪᠠᠭᠤᠳ ᠲᠠᠢ ᠪᠢ ᠠᠳᠠᠭᠠᠷᠬᠠᠳᠠᠭ ᠴᠤ | ᠠᠯᠤᠰ ᠲᠤ ᠨᠦᠷᠬᠢᠯᠡᠬᠦ ᠠᠶᠤᠩᠭᠠ ᠶᠢᠨ | ᠠᠷᠭᠠᠯ ᠤᠨ ᠤᠪᠤᠭᠠᠨ ︵ᠪᠦᠳᠦᠬᠡᠯᠬᠡ︶ ᠲᠡᠬᠡᠷᠡ ᠤᠨᠠᠭᠠᠭᠰᠠᠨ ᠤᠴᠢ ᠶᠢ ᠠᠮᠠᠨ ᠳᠤ ᠪᠠᠨ ᠵᠠᠭᠤᠵᠤ | ᠭᠠᠯ ᠤᠯᠠᠭᠠᠨ ᠪᠤᠯᠵᠤ ᠨᠢᠰᠬᠦ ᠬᠠᠴᠢᠨ ᠲᠤᠷᠠᠳᠠᠢ | ᠭᠡᠮ ᠦᠬᠡᠢ ᠬᠠᠷᠠᠩᠭᠤᠢ ᠶᠢᠨ ᠭᠦᠨ ᠤᠷᠤᠭᠤ ᠨᠢᠰᠬᠦ ᠳᠤ ᠪᠠᠨ | ᠬᠢᠯ ᠬᠠᠷᠠ ᠰᠤᠷᠮᠤᠤᠰᠤ ᠪᠠᠨ ᠴᠦᠳᠡᠨᠵᠡ ᠰᠢᠭ ᠵᠤᠷᠠᠵᠤ ᠨᠤᠴᠤᠭᠠᠭᠠᠳ | ᠬᠡᠷᠡᠯ ᠳᠤ ︽ᠮᠠᠭᠤᠯᠠᠭᠤᠯᠤᠨ︾ ᠠᠰᠠᠬᠤ ᠦᠶᠡ ᠳᠤ ᠪᠠᠨ | ᠨᠢᠯᠪᠤᠰᠤ ᠪᠠᠨ ᠰᠢᠬᠦᠳᠡᠷᠢ ᠠᠴᠠ ᠢᠯᠡᠬᠦᠦ ᠲᠤᠩᠭᠠᠯᠠᠭ ᠪᠤᠯᠭᠠᠨ | ᠬᠠᠮᠤᠭ ᠲᠡᠷᠢᠬᠦᠨ ᠳᠤ ᠨᠠᠳᠠ ᠳᠤ ᠤᠷᠤ ᠪᠠᠨ ᠵᠠᠶᠢᠴᠢᠯᠠᠭᠰᠠᠨ | ᠬᠠᠶᠢᠷᠠᠳᠠᠢ ᠴᠡᠴᠡᠭ ᠤᠨ ᠢᠶᠠᠨ ᠨᠡᠷᠡ ᠪᠠᠷ ᠤᠪᠤᠭᠯᠠᠨ | ᠮᠦᠨ ᠲᠡᠷᠡ ᠯᠡ ᠴᠡᠴᠡᠭ ᠢ ᠬᠡᠳᠦᠯᠬᠦ ᠬᠡᠮᠡᠨ | ᠮᠤᠩᠭᠤᠯ ᠤᠨ ᠬᠡᠬᠡᠷᠡ ᠲᠠᠯᠠ ᠳᠤ ᠪᠠᠭᠤᠳᠠᠯᠯᠠᠨᠠ | ᠮᠢᠩᠭᠠᠨ ᠴᠡᠴᠡᠭ ᠤᠨ ᠲᠤᠮᠳᠠ | ᠮᠦᠷᠦᠬᠡᠳᠦᠯ ᠲᠡᠬᠡᠬᠡᠭᠰᠡᠨ ᠡᠬᠡ ᠬᠦᠮᠦᠨ ᠰᠢᠭ ᠠᠮᠤᠷᠵᠢᠨᠠ | ᠲᠡᠨᠳᠡ ᠮᠠᠨ ᠤ ᠵᠤᠰᠠᠯᠠᠩ ᠤᠨ ᠨᠠᠷᠠ ᠲᠠᠢ ᠪᠤᠷᠤᠭᠠ | ᠡᠷᠳᠡᠨ ᠤ ᠤᠢ ᠶᠢᠨ ᠦᠨᠦᠷ ᠢᠶᠠᠷ ᠠᠰᠬᠠᠷᠠᠳᠠᠭ ᠶᠤᠮ ᠪᠠᠶᠢᠨᠠ ᠯᠡᠢ | ᠬᠤᠶᠠᠷ | ᠬᠠᠶᠠ ᠪᠢ ᠦᠤᠷ ᠤᠨ ᠬᠡᠬᠡᠨ ᠳᠤ ᠪᠤᠳᠠᠷᠠᠬᠤ ᠤᠳᠤᠨ ᠠᠴᠠ ᠤᠷᠢᠳᠠᠵᠤ | ᠬᠡᠷᠡᠯᠳᠤ ᠡᠳᠦᠷ ᠤᠨ ᠬᠠᠷᠢᠶᠠᠳᠤ ᠪᠤᠯᠵᠤ ᠠᠰᠠᠮᠠᠷ ᠰᠠᠨᠠᠭᠳᠠᠳᠠᠭ ᠴᠤ | ᠤᠭᠤᠷᠠᠭ ᠴᠠᠭᠠᠨ ᠰᠠᠷᠠᠨ ᠤ ᠲᠤᠭᠤᠤᠷ ᠤᠳᠠᠭᠠᠨ ᠨᠢᠰᠬᠦ ᠬᠠᠴᠢᠨ ᠲᠤᠷᠠᠳᠠᠢ | ᠪᠦᠳᠦᠨ ᠵᠤᠨᠵᠢᠨ ᠲᠤᠷᠠᠯᠠᠭᠰᠠᠨ ᠬᠠᠶᠢᠷᠠ ᠶᠢᠨ ᠴᠡᠴᠡᠬᠡᠰ | ᠲᠡᠷᠡ ᠯᠡ ᠬᠡᠷᠡᠯᠳᠤ ᠮᠦᠷᠡᠨ ᠢ ᠬᠡᠳᠦᠯᠵᠤ ᠪᠤᠯᠵᠤᠭᠠᠨ ᠳᠤ ᠪᠠᠨ ᠤᠴᠢᠳᠠᠭ ᠪᠤᠯᠬᠤᠷ | ᠰᠠᠯᠬᠢ ᠰᠡᠩᠭᠢᠨᠡᠭᠰᠡᠨ ᠰᠠᠷᠠᠭᠤᠯ ᠰᠦᠨᠢ ᠶᠢᠨ ᠲᠡᠬᠡᠪᠦᠷ ᠲᠤᠤᠷᠠ | ᠰᠠᠶᠢᠬᠠᠨ ᠠᠮᠠᠷᠠᠭ ᠤᠳ ᠤᠨ ᠵᠢᠷᠭᠠᠯ ᠳᠤ ᠪᠢᠯᠠᠭᠤᠷᠠᠭᠰᠠᠨ ᠵᠢᠷᠦᠬᠡ ᠶᠢ | ᠲᠠᠯᠠᠪᠴᠢ ᠪᠠᠷ ᠢᠶᠠᠨ ᠲᠡᠮᠳᠡᠷᠢᠬᠦ ᠬᠡᠵᠤ | ᠰᠡᠴᠡᠨ ᠰᠠᠷᠠᠨ ᠤ ᠮᠦᠷᠦᠨ ᠲᠡᠬᠡᠷᠡ ᠨᠢ ᠤᠴᠢᠵᠤ ᠰᠠᠭᠤᠯᠠ | ᠲᠡᠨᠳᠡ ᠠᠴᠠ ᠠᠵᠢᠯᠴᠢ ᠰᠢᠷᠭᠤᠯᠵᠢ | ᠶᠠᠪᠤᠭᠤᠯ ᠴᠠᠭᠠᠨ ᠰᠠᠷᠠᠠ ᠡᠬᠦᠯᠡᠨ ᠠᠴᠠ ᠪᠤᠯᠳᠠᠶᠢᠬᠤ ᠶᠢ ᠬᠦᠯᠢᠶᠡᠵᠤ | ᠵᠤᠰᠠᠯᠠᠩ ᠤᠷᠤᠭᠤ ᠮᠢᠨᠢ ᠬᠡᠷᠡᠯ ᠵᠠᠭᠤᠵᠤ ᠨᠢᠰᠳᠡᠭ ᠶᠤᠮ ᠪᠠᠶᠢᠨᠠ ᠯᠠᠢ | ᠭᠤᠷᠪᠠ | ᠨᠠᠮᠤᠷ ᠤᠨ ᠪᠤᠷᠤᠭᠠᠨ ᠤ ᠲᠠᠷᠠᠭᠠᠬᠠᠨ ᠨᠤᠷᠤᠭᠰᠠᠨ ᠲᠠᠯᠠᠪᠴᠢ ᠪᠠᠨ ᠲᠠᠶᠢᠯᠵᠤ | ᠨᠤᠭᠤᠭᠠ ᠶᠢᠨ ᠦᠨᠦᠷ ᠲᠤ ᠬᠠᠳᠠᠭᠠᠮᠠᠷ ᠰᠠᠨᠠᠭᠳᠠᠭᠰᠠᠨ ᠴᠤ | ᠲᠡᠯᠡᠬᠡᠢ ᠲᠦᠬᠦᠷᠳᠡᠯᠡ ᠲᠡᠪᠢᠰᠦᠭᠳᠡᠭᠰᠡᠨ ᠨᠢᠴᠦᠬᠦᠨ ᠬᠤᠰᠤᠨ ᠤ ᠭᠤᠨᠢᠭ ᠢ ᠮᠡᠳᠡᠷᠡᠬᠦ ᠬᠡᠵᠤ | ᠲᠡᠷᠡ ᠯᠡ ᠰᠢᠷᠭᠠᠯ ᠦᠩᠬᠡᠨ ᠲᠡᠬᠡᠷᠡ ᠠᠳᠤᠭᠤ ᠰᠢᠭ᠋ ᠬᠦᠷᠪᠡᠬᠡᠳ ᠪᠤᠰᠬᠤ ᠳᠤ | ᠦᠪᠴᠢ ᠪᠡᠶᠡ ᠮᠢᠨᠢ ᠡᠪᠡᠰᠦᠨ ᠤ ᠰᠤᠯᠤᠩᠭᠠ ᠰᠢᠭ᠋ ᠲᠤᠶᠠᠭᠠᠷᠠᠭᠠᠳ | ᠡᠪᠦᠬᠡᠨ ᠬᠤᠰᠤᠨ ᠤ ᠮᠦᠴᠢᠷ ᠦᠪᠡᠷ ᠢ ᠮᠢᠨᠢ ᠰᠢᠬᠦᠷᠦᠬᠡᠳ ᠠᠪᠤᠯᠠ | ᠲᠡᠷᠡ ᠮᠤᠳᠤᠨ ᠤ ᠲᠤᠤᠷᠠ ᠵᠤᠰᠠᠯᠠᠩ ᠤᠨ ᠮᠢᠨᠢ ᠪᠤᠷᠤ ᠲᠠᠤᠯᠠᠢ | ᠰᠦ ᠵᠡᠬᠦᠳᠦᠯᠡᠵᠤ ᠲᠤᠭᠵᠢᠷᠠᠳᠠᠭ ᠶᠤᠮ ᠪᠠᠶᠢᠨᠠ ᠯᠠᠢ | ᠲᠦᠷᠪᠡ | ᠬᠡᠨ ᠴᠤ ᠮᠡᠳᠡᠬᠦ ᠦᠬᠡᠢ ᠵᠦᠭ ᠲᠤ ᠨᠢᠰᠴᠤ | ᠬᠡᠨ ᠴᠤ ᠲᠠᠨᠢᠬᠤ ᠦᠬᠡᠢ ᠤᠯᠠᠷᠢᠯ ᠳᠤ ᠠᠮᠢᠳᠤᠷᠠᠮᠠᠷ ᠰᠠᠨᠠᠭᠳᠠᠭᠠᠳ | ᠭᠠᠯ ᠰᠢᠷᠭᠠᠯ ᠨᠠᠷᠠ ᠲᠤᠳᠤᠷᠠ ᠨᠢ ᠦᠷᠳᠡᠬᠡᠯᠡᠵᠤ | ᠭᠠᠭᠴᠠ ᠴᠠᠭᠠᠨ ᠰᠠᠷᠠ ᠬᠠᠶᠠᠭᠠᠨ ᠳᠤ ᠨᠢ ᠵᠤᠰᠠᠳᠠᠭ | ᠬᠦᠯᠬᠡᠨ ᠶᠡᠭᠡ ᠰᠤᠳᠤᠷ ᠤᠨ ᠲᠤᠳᠤᠭᠤᠷ ᠠᠶᠠᠯᠠᠭᠰᠠᠭᠠᠷ | ᠵᠢᠷᠦᠬᠡ ᠨᠢ ᠵᠤᠭᠰᠤᠭᠰᠠᠨ ᠨᠢᠬᠡᠨ ᠨᠠᠶᠢᠷᠠᠭᠴᠢ ᠶᠢᠨ | ᠵᠠᠭᠤᠨ ᠲᠠᠮᠵᠢᠭᠤᠯᠤᠨ ᠦᠯᠡᠳᠡᠬᠡᠭᠰᠡᠨ ᠨᠠᠶᠢᠷᠠᠭ ᠤᠨ ᠬᠢᠨᠢ | ᠵᠤᠯᠠ ᠶᠢᠨ ᠬᠡᠷᠡᠯ ᠰᠢᠭ ᠪᠠᠳᠮᠠᠯᠠᠨ ᠪᠠᠳᠮᠠᠯᠠᠨ ᠠᠰᠠᠳᠠᠭ | ᠲᠡᠷᠡ ᠯᠡ ᠬᠡᠷᠡᠯᠳᠤ ᠮᠦᠷ ᠲᠡᠬᠡᠷᠡ ᠨᠢ ᠤᠴᠢᠵᠤ ᠰᠠᠭᠤᠯᠠ | ᠲᠡᠨᠳᠡ ᠴᠠᠩᠭᠠᠭᠰᠠᠨ ᠮᠢᠩᠭᠠᠨ ᠠᠳᠤᠭᠤ | ᠴᠠᠭᠠᠨ ᠨᠠᠭᠤᠷ ᠤᠨ ᠬᠦᠬᠡ ᠮᠠᠨᠠᠨ ᠢ ᠡᠷᠬᠦᠵᠤ | ᠰᠢᠪᠠᠭᠤᠨ ᠤ ᠬᠡᠯᠡ ᠪᠠᠷ ᠦᠤᠷᠰᠡᠳᠡᠭ ᠶᠤᠮ ᠪᠠᠶᠢᠨᠠ ᠯᠡᠢ | ᠲᠠᠪᠤ | ᠰᠦᠰᠦᠭᠯᠡᠨ ᠮᠦᠷᠬᠦᠭᠴᠢᠳ ᠤᠨ ᠵᠠᠯᠪᠠᠷᠢᠭᠰᠠᠨ ᠠᠯᠠᠭᠠᠨ ᠠᠴᠠ | ᠰᠡᠳᠬᠢᠯ ᠨᠢ ᠰᠤᠯᠤᠩᠭᠠᠷᠠᠬᠤ ᠶᠢ ᠬᠠᠷᠠᠬᠤ ᠬᠡᠵᠤ | ᠰᠦᠮᠡ ᠶᠢᠨ ᠬᠠᠭᠠᠯᠭᠠ ᠪᠠᠷ ᠤᠷᠤᠵᠤ ᠭᠠᠷᠬᠤ | ᠠᠯᠳᠠᠨ ᠬᠠᠷᠢᠶᠠᠴᠠᠢ ᠪᠠᠷ ᠬᠡᠯᠡ ᠲᠠᠶᠢᠯᠭᠠᠨ | ᠲᠤᠯᠤᠭᠠᠨ ᠪᠤᠷᠬᠠᠨ ᠲᠤᠭᠵᠢᠷᠠᠬᠤ ᠶᠢᠨ ᠬᠤᠭᠤᠷᠤᠨᠳᠤ | ᠲᠠᠯᠠᠪᠴᠢ ᠪᠠᠨ ᠬᠤᠮᠢᠵᠤ ᠤᠳᠤ ᠡᠷᠬᠡᠰ ᠪᠤᠯᠤᠨ ᠬᠡᠷᠡᠯᠳᠦᠬᠡᠳ | ᠪᠤᠷᠬᠠᠨ ᠤ ᠮᠤᠳᠤᠷ ᠲᠡᠬᠡᠷᠡ ᠵᠠᠪᠢᠯᠡᠵᠤ ᠰᠠᠭᠤᠯᠠ | ᠲᠡᠨᠳᠡ ᠵᠤᠰᠠᠯᠠᠩ ᠤᠨ ᠮᠢᠨᠢ ᠠᠮᠤᠷ ᠠᠮᠤᠭᠤᠯᠠᠩ ᠤᠨ ᠠᠭᠠᠷ ᠢ ᠪᠤᠮᠪᠠᠯᠠᠭᠰᠠᠨ | ᠠᠯᠳᠠᠨ ᠪᠤᠮᠪᠤ ᠪᠠᠶᠢᠳᠠᠭ ᠶᠤᠮ ᠪᠠᠶᠢᠨᠠ ᠯᠠᠢ | ᠵᠢᠷᠭᠤᠭᠠ | ᠬᠠᠶᠠ ᠪᠢ ᠴᠢᠳᠦᠷ ᠲᠠᠢ ᠮᠤᠷᠢ ᠲᠤᠷᠬᠢᠬᠤ ᠳᠤ ᠯᠡ ᠬᠠᠶᠢᠯᠵᠤ ᠮᠡᠳᠡᠬᠦ | ᠰᠦᠨᠢ ᠶᠢᠨ ᠴᠠᠰᠦᠨ ᠤ ᠴᠡᠴᠡᠭᠡᠨ ᠳᠤ ᠲᠤᠷᠠᠯᠠᠭᠰᠠᠨ | ︽ᠡᠪᠦᠯ ᠤᠨ ᠡᠷᠪᠡᠬᠡᠢ︾ ᠪᠤᠯᠵᠤ ᠨᠢᠰᠬᠦ ᠬᠠᠴᠢᠨ ᠲᠤᠷᠠᠳᠠᠢ | ᠲᠡᠷᠡ ᠴᠠᠰᠤᠨ ᠤ ᠤᠰᠤ ᠪᠠᠷ ᠪᠡᠶᠡ ᠪᠠᠨ ᠠᠷᠴᠢᠭᠤᠯᠬᠤ ᠬᠡᠵᠤ | ᠡᠷᠳᠡᠨ ᠤ ᠵᠢᠷᠤᠭᠠᠴᠢ ᠶᠢᠨ ᠵᠢᠷᠤᠭᠰᠠᠨ | ᠡᠬᠡᠯ ᠲᠠᠷᠤᠤᠬᠠᠨ ᠲᠤᠷᠤᠨᠠᠳᠠᠬᠢᠨ ᠤ ᠲᠡᠯᠬᠡᠵᠤ ᠲᠠᠯᠪᠢᠭᠠᠳ | ᠡᠪᠬᠡᠵᠤ ᠠᠮᠵᠢᠭᠠ ᠦᠬᠡᠢ ᠲᠡᠷᠡ ᠪᠤᠭᠤᠷᠤᠯ ᠲᠠᠯᠠ ᠶᠢᠨ | ᠰᠠᠯᠬᠢᠨ ᠤ ᠲᠡᠪᠡᠯ ᠬᠦᠪᠦᠷᠢᠳᠦᠭᠰᠡᠨ ᠴᠠᠭᠠᠨ ᠡᠪᠡᠰᠦᠨ ᠲᠡᠬᠡᠷᠡ ᠨᠢ ᠤᠴᠢᠵᠤ ᠰᠠᠭᠤᠯᠠ | ᠲᠡᠨᠳᠡ ᠦᠯᠢᠬᠡᠷ ᠶᠡᠷᠢᠵᠤ ᠤᠷᠤᠭᠤᠯ ᠨᠢ ᠨᠢᠮᠬᠡᠷᠡᠭᠰᠡᠨ ᠠᠮᠠ ᠴᠠᠭᠠᠨ ᠬᠤᠯᠤᠭᠠᠨᠠ | ᠬᠠᠷᠠ ᠨᠢᠳᠤᠨ ᠬᠠᠷᠠᠵᠠᠨ ᠲᠡᠬᠡᠷᠡ ᠬᠠᠨᠳᠠᠭᠠᠢ ᠲᠠᠢ ᠬᠠᠮᠳᠤ ᠤᠰᠤ ᠤᠤᠭᠤᠳᠠᠭ ᠶᠤᠮ ᠪᠠᠶᠢᠨᠠ ᠯᠡᠢ | ᠲᠤᠯᠤᠭᠠ | ᠴᠡᠴᠡᠭ ᠤᠨ ᠬᠡᠯᠪᠡᠷᠢ ᠲᠠᠢ ᠵᠤᠨ ᠠᠴᠠ | ᠨᠠᠪᠴᠢᠨ ᠬᠡᠯᠪᠡᠷᠢ ᠲᠠᠢ ᠨᠠᠮᠤᠷ ᠲᠠᠭᠤᠰᠳᠠᠯᠠ | ᠨᠢᠰᠦᠨ ᠨᠢᠰᠦᠭᠰᠡᠬᠡᠷ ᠤᠯᠠᠷᠢᠯ ᠤᠨ ᠦᠡᠭᠬᠡ ᠪᠡᠶᠡᠨ ᠠᠴᠠ ᠮᠢᠨᠢ ᠬᠡᠶᠢᠰᠴᠤ ᠲᠠᠭᠤᠰᠤᠭᠠᠳ | ᠲᠡᠪᠢᠨ ᠲᠡᠪᠢᠨ ᠲᠡᠪᠢᠭᠰᠡᠬᠡᠷ ᠲᠡᠯᠡᠬᠡᠢ ᠶᠢᠨ ᠵᠢᠪᠡᠷ ᠲᠠᠯᠠᠪᠴᠢᠨ ᠲᠡᠬᠡᠷᠡ ᠮᠢᠨᠢ ᠬᠦᠨᠳᠦᠳᠡᠬᠦ ᠶᠢᠨ ᠴᠠᠭ ᠲᠤ | ᠬᠠᠮᠤᠭ ᠤᠨ ᠮᠠᠭᠤᠬᠠᠢ ᠨᠠᠮᠤᠭ ᠪᠠᠯᠴᠢᠭ ᠲᠤ ᠤᠷᠭᠤᠳᠠᠭ | ᠪᠠᠳᠮᠠᠯᠢᠩᠬᠤᠸᠠ ᠴᠡᠴᠡᠭ ᠤᠨ ᠲᠠᠯᠪᠡᠬᠡᠨ ᠲᠡᠬᠡᠷᠡ ᠰᠠᠭᠤᠵᠤ | ᠰᠢᠬᠦᠳᠡᠷᠢ ᠰᠢᠮᠡᠬᠦ ᠵᠠᠶᠠᠭᠠ ᠪᠠᠨ ᠬᠦᠯᠢᠶᠡᠨᠡ | ᠬᠠᠳᠤᠨ ᠡᠷᠪᠡᠬᠡᠢ ᠨᠠᠳᠠ ᠳᠤ ᠮᠤᠩᠭᠤᠯ ᠤᠷᠤᠨ ᠠᠴᠠ ᠪᠡᠯᠡᠳᠥᠭᠰᠡᠨ | ᠤᠷᠴᠢᠯᠠᠩ ᠴᠢᠨᠡᠬᠡᠨ ᠵᠤᠰᠠᠯᠠᠩ ᠤᠨ ᠮᠢᠨᠢ | ᠴᠡᠴᠡᠭ ᠤᠨ ᠦᠨᠦᠷ ᠲᠠᠢ ᠮᠠᠨᠴᠦᠢ ᠬᠡᠵᠤ ᠲᠡᠷᠡ ᠶᠤᠮ | ᠲᠡᠨᠳᠡ ᠪᠠᠨ ᠪᠢ ᠢᠷᠡᠬᠦ ᠬᠠᠪᠤᠷ ᠢ ᠤᠭᠳᠤᠨ | ᠬᠤᠷᠸᠠ ᠶᠢᠨ ᠬᠠᠮᠤᠭ ᠤᠨ ᠭᠤᠸᠠ ᠦᠵᠡᠰᠬᠦᠯᠡᠩᠳᠦ ᠡᠬᠡ ᠪᠤᠯᠵᠤ ᠠᠮᠤᠷᠵᠢᠨᠠ | ᠲᠡᠷᠡ ᠦᠶᠡ ᠳᠤ ᠮᠢᠨᠤ ᠨᠢᠳᠤᠨ ᠲᠤᠳᠤᠷᠠ ᠮᠤᠩᠭᠤᠯ ᠤᠨ ᠲᠡᠭᠷᠢ ᠴᠡᠯᠮᠡᠨᠡ | ᠮᠢᠨᠤ ᠲᠠᠯᠠᠪᠴᠢᠨ ᠲᠡᠬᠡᠷᠡ ᠠᠴᠠ ᠮᠤᠩᠭᠤᠯ ᠤᠨ ᠨᠢᠬᠡ ᠡᠳᠦᠷ ᠡᠬᠢᠯᠡᠨᠡ | ᠮᠢᠨᠤ ᠪᠡᠯᠡᠳᠦᠭᠰᠡᠨ ᠮᠠᠨᠴᠤᠢ ᠠᠴᠠ ᠮᠤᠩᠭᠤᠯ ᠤᠨ ᠭᠠᠵᠠᠷ ᠰᠢᠷᠦᠢ ᠦᠨᠦᠷᠳᠦᠨᠡ | ᠮᠢᠨᠤ ᠵᠤᠬᠢᠶᠠᠭᠰᠠᠨ ᠪᠦᠪᠠᠢ ᠶᠢᠨ ᠠᠶᠠᠯᠭᠤᠨ ᠠᠴᠠ ᠮᠤᠩᠭᠤᠯ ᠤᠨ ᠢᠷᠡᠬᠡᠳᠦᠢ ᠰᠤᠨᠤᠰᠳᠠᠨᠠ | ᠬᠠᠳᠤᠨ ᠡᠷᠪᠡᠬᠡᠢ ᠪᠢ ᠮᠢᠩᠭᠠᠨ ᠴᠡᠴᠡᠭ ᠤᠨ ᠲᠤᠮᠳᠠ ᠠᠮᠤᠷᠵᠢᠳᠠᠭ ᠡ | ᠬᠠᠭᠠᠨ ᠡᠷᠪᠡᠬᠡᠢ ᠪᠢ ᠮᠤᠩᠭᠤᠯ ᠤᠨ ᠶᠡᠭᠡ ᠬᠡᠬᠡᠷᠡ ᠲᠠᠯᠠ ᠳᠤ ᠵᠤᠰᠠᠳᠠᠭ ᠡ | ᠵᠤᠬᠢᠶᠠᠬᠴᠢ ᠶᠢᠨ ᠬᠠᠶ᠋ᠢᠭ᠄ ᠠᠯᠠᠱᠠ ᠠᠶᠢᠮᠠᠭ ᠤᠨ ᠵᠤᠬᠢᠶᠠᠯᠴᠢᠳ ᠤᠨ ᠨᠡᠶᠢᠭᠡᠮᠯᠢᠭ ᠤᠨ ᠵᠤᠬᠢᠶᠠᠨ ᠪᠦᠳᠦᠭᠡᠬᠦ | ᠦᠷᠦᠭᠡ |